المريخ واحد...المريخ وطالع

من غير كتر كلام يا بشر انا بقيت حاسس بحالة شديدة من القرف، حالة من عدم الرضا تنتابني عن كل شيء، معقولة كل حاجة الواحد بيشوفها غلط، ولا الدنيا هيه اللي ماشية بضهرها اليومين دول ولا ايه؟ بقة بالزمة دي بلد ولا دي قارة ولا ده كوكب يصلح ان الواحد يعيش عليه. اقولك ايه ولا ايه ولا ايه؟ امسك الخريطة كده و"فرها" دولة دولة وشوفلي وحياة ابوك دولة "عدلة عادلة معتدلة" اروح اعيش فيها.اعمل اعلان في الجرايد، مسابقة زي بتوع 0900 أو حتى اعمل نداء انساني وعلقه على عمدان النور من الصين وحتى الاسكا واكتب فيه مطلوب للهجره اليها بلد في أي قارة كانت تحت أي ديانة كانت ووفق أي نظام اجتماعي او سياسي معروف او حتى مجهول، مطلوب فقط توافر شرط بسيط اني اعيش هناك من غير "وجع دماغ".

فالثابت معشر السادة أعضاء كوكبنا الواسع الفسيح ان احنا مبقيناش طايقين بعض، حالة من ضيق الخلق تنتشر في المناخ الأرضي، الكائن الأرضي مبقاش مستحمل أخوه الكائن والسلوك البشري اصبح على درجة كبيرة من "الدناوة والوطو" فبدءًا من الشركات الغربية اللي بترمي أطنان من المحاصيل الزراعية في المحيط عشان تحافظ على الأسعار العالمية من الهبوط في الوقت الذي تعاني فيه أغلب شعوب القارة الأفريقة من المجاعات وحتى صاحب محل الكاسيت اللي على أول شارعنا واللي مصدع دماغي يوميا بكافة أنواع وأصناف الغناء بدءًا من إليسا وعمرو دياب وحتى أسامة عبد الغني وأنغام البحيري (متعرفوهاش دي طبعا) أصبح العامل المشترك اللي بيجمع الصيني بالكويتي بالمصري بالبوركيني بالهولندي فالأمريكي إن كلهم أصبح "معندهمش دم". فـ "الجليطة" هي الأسلوب
المتبع للتعامل مع الآخر و"قلة الزوق" ماركة مسجلة أما قلة الأدب فهي - والحمد لله - الراعي الرسمي لكوكب الأرض، وعليك عزيزي الطهقان أن تتحلى بأكبر قدر من التناحة والغتاتة والتلامة كي تتمكن من الصمود في معترك الحياة اليومي طبقًا لنظرية "البقاء للأرزل" هذا وإلا، حاول أن تضع على أعصابك أكبر قدر ممكن من التلج وتحقن نفسك بأكبر قدر من المسكنات كي لا تسقط فجأة صريع انفجار في المرارة (اللي هيه مفقوعة خلقة) أو نزيف في المخ.

حتى اخوانا الاسكيمو القابعين في أقصى شمال الكوكب بعيييييد بعييييييد لم يسلموا من قلة أدبنا ولا من مخلفات وعوادم المصانع بتاعتنا (قصدي بتاعة الدول الصناعية، ما احنا خلاص "خسسنا" مصانعنا وجبنا ضرفها) التي خرمت أوذونهم "خرمًا قد كده" تسبب في ارتفاع غير طبيعي لدرجات الحرارة بالقطب الشمالي مما نتج عنه ذوبان جبال الجليد وكلها يومين وتلاقي المواطن "الإسكيموهي" قالع الفرو ولابس مايوه وبياخد غطس في البحر القطبي الدافئ وسلملي بقه على معاهدة كيوتو واخواتها.

بلاها كيوتو على الإسكيمو، احنا ايه اللي هيطلعنا فوق اوي كده، انزل تحت شوية تلاقي اوروبا ونعيمها، فلوس وحريم وعيشة. زمان كان الخواجة الاوروبي صايع ولافف وداير الكوكب دولة دولة يقلب عيشه ولما ربنا فتحها عليه رجع بلده ..قفل عليه بابه وقالها بالمفتشر، "سوري خبيبي، أوروبا دلوكتي كامل العدد" فدول الاتحاد الأوروبي الموقر بعد ما نهبت - وتنهب وستنهب - ثروات دول القارة السمراء من بترول وماس ويورانيوم مش عاجبها ان شحاتين القارة يهاجروا إليها بحثًا عن فرص لمعيشة أفضل، يعني بالبلدي كده "اخد منك آه انما أديك لا" واتفقوا انهم كده بربطة المعلم يمنعوا الهجرة إليها سواء شرعية أو غير شرعيه، بالزمة فيه "وطو" اكتر من كده. قلت في عقل بالي بلاها أوروبا، وبعدين برضه ياخي الناس معذورة، دنتا حتى تبص للعيال بتوع منتخب فرنسا كلهم لونهم اسمر متعرفش تفرقهم عن منتخب زيمبابوي، لذا حفاظًا على "بياض" القارة الأوروربية هنصرف نظر عن أوروبا. طب تروح فين يا لاجئ، لف شمال يا اسطى وبينا على أمريكا بس وحياتك ابقه اعمل حسابك تشيل خانة الديانة من جواز سفرك وبالمرة تغير اسمك ولو كنت نسيت تحلق دقنك من اسبوع فأعتقد أنه قد حان الوقت المناسب لذلك، وإلا فلتستعد لقضاء أجازة الصيف - وكل صيف - في جوانتانامو، والتهمة طبعًا معروفة ..مسلم.

طب سيبك من أمريكا كمان، بلاها الدول الغنية المرفهة دي وتعالى نروح مع الناس المطحونة، لف جيبة قش حوالين وسطك وشيل رمح بدائي وبينا على أدغال أفريقيا يا حلو، وانت لسه على أول القارة ..سامع الصوت ...نار ورصاص؟؟..ايوه يا سيدي انت مش غلطان، نسينا نقول لحضرتك ان الناس في كينيا قايمين على بعض الله اعلم ليه وكل يوم كده فيه بتاع 100 قتيل ولا حاجة (شفت الدنيا وردي ازاي) اما بقه في تشاد فالجماعة المعارضين راحوا حاصروا قصر الرئاسة وتقريبا كده كانوا عاوزين يعلقوا رئيسهم على خازوق زي اخونا سليمان الحلبي الله يرحمه - ادي الشعوب ولا بلاش - لكن طبعا الراجل (كعادة الرؤساء) طلع ناصح وضحك عليهم
ومبيتش في القصر.

ايه رأيك؟ أفريقيا لبش..مش كده. طب بروجرام الرحلة ناقص فيه ايه تاني؟؟ الصين..بس ..هيه الصين، ناس بتشتغل وبتنتج ومش فاضيه للكلام الفارغ بتاع الشعوب التانية دي، بس شوف يا اخي الفلوس بتغير النفوس ازاي؟!! بعد ما ربنا فتحها على الصينيين وشموا نفسهم وبقوا قوة عظمى بعد ما كانوا يشحتوا من الأمم المتحدة منتصف القرن الماضي، افتروا على مخاليق ربنا وباعتين الجيش عشان يفرد عضلاته على دراويش التبت بحجة انهم عاوزين ينفصلوا وبتاع وكده؟
طب لف وارجع تاني مفيش صين النهاردة ولا أي يوم تاني.. أروح فين ..أروح فين..مفيش دولة توحد ربنا قاعدة في حالها كافية خيرها شرها؟؟!!!! خلاص ضاق هذا الكوكب بيا.

بس .. لقيتها ..مفيش غير المكان ده هوه اللي هلاقي فيه الهدوء وراحة البال ..
تاكسي ...تاكسي....المريخ يا أسطى لو سمحت