بعد السلام عليكم....
من غير استغراب ودهشة وسؤال عن سبب اختياري للاسم ده جاوبني انت الأول، هوه حضرتك مش طهقان برضة؟ فكرة الإسم جات في بالي بعدما دعاني أحد أصدقائي إلى الجروب الخاص به عالفيس بوك واللي كان موضوعه حاجة بسيطة جدا، هوه ليه كلنا زهقانين وحاسين بملل والحياة بقت خنيقة بشكل بشع؟؟؟!!!!! فبغض النظر عن الأسباب.....يا عزيزي كلنا طهقانون. فإذا كان هذا هو التيار السائد في تلك الأيام، أظن أنه ليس من الغريب على شاب مسلم عربي مصري زملكاوي (وآه من تلك الأخيرة) أن يختار عنوان "شاب طهقان" لمدونته. فالعبد لله يتعرض بشكل يومي لعدد من المزهقات والمعكننات والمفقعات المرارات إلى حد تصيني معه الدهشة من كيفية بقائي على قيد الحياة طوال تلك الفترة، كيف لم أصاب بنزيف المخ حتى الآن؟ ولذا، فإنني من هذا المزنق أعلن عليكم أبناء جنسي من البشر تلك الحقيقة المرة - لمن لم يعرفها بعد - أن تلك الحياة قد أصبحت "خنيقة عالآخر" ومليئة "بالعوأ" إلى درجة لا تحتمل. وبدلاً من أن "أغل في نفسي واكتم جوايا" لحد ما يجرالي حاجة، قررت أن أنفجر في وشكم (خدلك ساتر بقه).
كلمة أخيرة للي حظه الاسود هيرميه عالمدونة دي: شوف يا صاحبي ... قد تتفق مع ما ستقرأه من آراء في تلك المدونة أو تختلف معها ..مافيش أي مشكلة وزي ما دايمًا بنقول "الاختلاف في الرأي لا يفسد (للوز) قضية" . لكن....تلتزم بالأدب هتبقه صاحبي وحبيبي وكفاءة، هتقل أدبك هعصرك أنزل منك guests صغيرين. وكفاية عليكم كده....سلام
هناك تعليق واحد:
عزيزي الزهقان الطهقان بما اننا اخوة واشقاء في الزهق احب اهنيك واهني كل مصري على الانجاز الكبير اللي عملوه رجالة مصر ويارب دايما نفرح....... الناس ما صدقت تفرح... بس انا بجد نفسي لما اجيب ولد اطلعه لعيب كورة علشان يكسب دهب واتغنى على قفا ابني ههههههههههه ربنا يجعلنا من بركاتهم وسلملي على اللي بالي بالك ؟؟؟؟ nahola
إرسال تعليق